Jon 3 | ZomZIV | STEP | Tua ciangin Jonah tungah a nihveina TOPA thu tunga:

Jonah 3

Nineveh ah Jonah Pai

1 Tua ciangin Jonah tungah a nihveina TOPA thu tunga: 2 “Khuapi lian Nineveh ah pai inla kong gen thu va tangko in,” a ci hi. ^a

3 Jonah in TOPA thu mangin Nineveh ah pai hi. Nineveh pen khuapi thupi mahmah khat ahi hi; ni thum sung kikantan khop hi. 4 A ni masa ni-in Jonah kipan a,”Ni sawmli khit ciangin Nineveh kisusia ding hi,” ci-in a tangko hi. 5 Nineveh mite in Pasian a um uh hi. Antan nading thu thangsak uh a, a neupen pan a lianpen dong a vekpi-un puan hampi a silh uh hi. ^b

6 Nineveh kumpipa in tua thu a tun ciangin a kumpi tokhom pan dingkhia a, a kumpi puan suahkhia-in, puan hampi-in kituam a, leivui lakah a tu hi. 7 Tua ciangin Nineveh khua sungah thukhat tangko saka:

“Kumpipa le a uliante thukip piakna tawh:

“Mihing, ganhing, bawnghon, tuuhon an ne tui dawn om thei lo ding hi. 8 Mihing ganhing khempeuh in puan hampi silh ding hi. A kua mahpeuh in manlangin Pasian sam uh hen. A ngongtatna uh le a gitloh gamtatnate uh sem nawn peuhmah kei uh hen. 9 Eite i siat loh nadingin a hehluatna panin kihei-in Pasian in hong khuatuah loh ding kua in thei ahi hiam?” a cisak hi.

10 Pasian in amaute hihnate mu-a, a gitlohnate uh a tawpsan uh a muh ciangin khuatuah a, amau tunga a tunsak ding siatna a tungsak nawn kei hi.